TACLOBAN CITY– Padayon nga gin-papanginano han Mines and Geoscience Bureau (MGB) regional office 8, an mga reklamo nga igindadaop ha ira buhatan, kasumpay hiton pagmimina ngan pangutod hiton punong kahoy nga waray permiso.
Sumala kan Gleen Marcelo Noble, Regional Director Mines and Geoscience Bureau Regional Office Vlll, ha pagkayana mayda nak-reshistro nga mining corporation nga ira ginmomonitor an mga ine iton Emir Mineral Resources Corporation (EMRC),Chromite King Inc. ngan Nickelace Inc. mining corporation.
Sumala kan Noble, usa ha ira ginpro-proseso yana an reklamo han pira na mga residente nga an Emir Mineral Resources Corporation in nangutod hin punong kahoy nga waray permiso ha area 14, ha Barangay Casuguran Homonhon Island, Guiuan Eastern Samar.
Sumala naman kan Carmi Macapagao, President Homonhon Environmental Advocates and Rights Defenders, nangutod an nasabi nga kompaniya ha area 14 kun diin ha ira panginano in waray ine may naipresenta nga permit ngan dokumento ha nasabi nga clearing operation.
Dugang pa ni Macapagao, nababaraka hira matungod nga an area 14 an ira ginkukuhaan hiton tubig.
Ha pagkayana, nagpadara na an MGB han ira mga tinaglawas ngan nakipag-coordinate na hira ha DENR ngan CENRO Borongan, para panginanuon an nasabi nga reklamo, ngan naglalaom an ira opisina nga makakagpagawas na hira in resulta ha masunod nga adlaw kasumay hiton imbestigasyon.
Dugang pa ni Noble, dire mangud hira pwede nga magpagawas dayon hin order kun dire ine naagi ha sakto nga proseso.
Mababaruan nga an Emir Mineral Resources Corporation in nagkamayda hin permit to operate ha Homonhon Island han nakalabay nga 2024.
