TACLOBAN CITY — Duro an paningkamot han mga personel han Business Permit & Licensing Division (BPLD) ngan Traffic Operations Management Enforcement and Control Office (TOMECO) agud madakpan an mga colurom nga mga sarakyan nga namamasada ha kakalsadahan ha siyudad ha Tacloban.
Sumala kan Jobs Lagutan, Head Traffic Engeneering Division han TOMECO, nahurak ha pamasada an mga colurom nga mga sarakyan kun dis-oras na hit kagab-ihon kun diin ha pagtuo han mga ini nga deri hira madadakpan.
Sanglit, ginmalatumat daw nira kasugbong an mga kapulisan ngan BPLD nga igkasa an ira operasyon ha gab-i agud magkakadakpan an mga colurom o waray mga Business Permit nga mga sarakyan.
Usa manggud ha mga ginkikinanghalan nga requirement agud hapsay nga makapag-pakabuhi an mga drivers in amo an pagkuha hin Mayor’s Business Permit.
An mao nga permit in agud maging lehitimo nga namamasada ngan pananglitan man nga madakpan in mayda han mga ini maipapakita nga mga papel o dukomento ha mga otoridad.
