TACLOBAN CITY – Nagdumara an Philippine Drug Enforcement Agency (PDEA) Regional Office 8 hin mandatory drug testing ha mga personnel ngan sugadman mga Persons deprived of Liberty (PDL) ha Tacloban City Jail Female Dormitory.
Sumala kan Senior Jail Officer 3 Lydia Obias, OIC han Tacloban City Jail Female Dormitory, maabot ha 25 nga mga PDLs nga may drug cases ha female dormitory ngan sugadman tanan han mga personnel han city jail an ginpailarom ha mao nga mandatory drug testing.
Ini in kaparte han pagsalin-urog han 2021 Women’s Month celebration yana nga bug-os nga bulan kun diin damo an mga ginlatag nga aktibidad han Tacloban City Jail Female dorm kasumpay hini.
Samtang, nahibaruan naman nga ha pagkayana in gindidire la gihapon an pabisita ha mga PDLs han ira mga paryente pero tatagan an mga ini hin pabor para makaistorya an ira mga pamilya pinaagi han virtual o video calls.
