ORMOC CITY – Natagan hin bag-o nga paglaum an mga Persons Deprived of Liberty (PDLs) nga naka-preso ha Ormoc City Jail pinaagi han ginhahatag nga ‘skills training’ ha ilarom han mga programa nga nakatutok ha rehabilitasyon ngan pagtapod ha kalugaringon.
Ha sulod han Ormoc City Jail, pira nga PDLs an nagpapailarom han skills training ha Elecrical Installation ngan Maintenance (EIM) NC II, usa nga skill nga makakabulig ha mga ine ha pakiusa ngan pagpakabuhi kahuman magserbi han ira mga sentensya.
Pinaagi han pagbinuligay han Bureau of Jail Management and Penology (BJMP), Technical Education and Skills Development Authority (TESDA), ngan han City Government of Ormoc, ginsisigurado han nasabi nga training nga makakakarawat an mga PDLs in sakto nga giya nga makakaghatag ha mga ine national certification.
An nga PDLs in gintagan hin 196 kaoras o kaparehas han 25-diyas nga mahugot ngan hands-on nga eksperyensya han hibaro nga nakatutok ha pagtutdo ha mga ine hin praktikal ngan marketable skills ha pantag han electrical installation and maintenance.
Sumala kan James Recaña han TESDA Center-Ormoc, sakop han training an mga importante nga hibaro sugad han pagdumara han roughing-in, pagbubutang han mga kable ngan wirings, pati na gihapon an pag-install han mga auxiliary terminal cabinet ngan distribution panel.
Gintutduan gihapon an mga PDLs han sakto nga paggamit han teknik han pagsukol agud masigurado an sakto ngan episyente nga pag-install, ngan an importansya han pagigin sigurado ngan katalwasan ha electrical work.
Nagpasalamat naman an mga PDLs ha ginhahatag nga training han pasilidad mahitungod nga nakabulig daw ine agud mahibaruan nira an disiplina ngan an ira ‘self-worth.’
Labot pa han teknikal nga hibaro, ginpunto han mga PDLs nga gintututdo gihapon han training an pagigin pasensyoso, pagbibinuligay, ngan responsibilidad—mga pamatasan nga importante agud makagtikang hin bag-o nga kinabuhi ha gawas han detensyon.
Para han buhatan, ha kaluyo han pagkaka-kilala han ira pasilidad kumo taga-serbi han sirot, ginpapamatud-an han nasabi nga mga programa nga an rehabilitasyon ngan sakto nga hibaro ngan abilidad in pwede mag-abri hin mga purtahan para han mga second chances.
