TACLOBAN CITY – Ginpahayag han Department of Health (DOH) Region 8 nga nakapaghipatik hin clustering hin dengue cases ha pira nga mga barangay ha Sta. Fe Leyte.
Sumala kan John Paul Roca, tagapagyakan han DOH Regional Office 8, maabot ha 23 nga kaso hin dengue an nahipatik ha tulo nga barangay ha Sta. Fe partikular na ha Brgy. Milagrosa, Brgy. San Juan, ngan Brgy. San Roque.
Dayon naman nga nagbuhat hin aksyon an ahensiya pinaagi han pagmonitor han mga pasyente, pagdumara hin misting ngan fogging activities ha mga apektado nga barangay.
Nahibaruan nga ha bug-os nga rehiyon in maabot na ha 4,351 an nahipatik nga kaso hin dengue yana nga tuig kun diin 18 katawo na an namatay.
Gin-aghat naman han health department an publiko nga makiusa ha ira kampanya kontra dengue pinaagi han paglimpyo han ira kalibungan labi na nga ginlalauman an paghitaas han kaso han mao nga sakit yana nga nagtikang na an panahon han kat-uran.
