TACLOBAN CITY – Karuyag maadman han mga pulisya an mga posible nga mga crime prone areas ha siyudad han Tacloban, kun diin ginkikita karuyag nira mahibaruan iton mga areas of concerns nga dapat solusyonan.
Sumala kan PMaj. Marjorie Manuta, Information Officer han Tacloban City Police Office, nga karuyag nira maadman iton exact nga mga lugar nga prone hiton krimen sugad nala hiton hold-up, theft, ngan robbery ngan iba pa nga mga krimen, para matagan hin solusyon iton kinahanglanon ha mao nga mga prone areas.
Basar naman hiton datos han TCPO, nga gutiay iton insidente ngan hitaas iton rate han mga nasolbar nga kaso kumpara han nakalabay nga tuig.
Manunumduman nga dida han nakalabay, upat nga studyante an gintapo ngan gin hold-up han duwa ka dire pa nakikilala nga mga suspek ha Gomez, Real Tacloban City, kun diin padayon naman nga ginpapanigurohan hiton pulisya nga magkadadakop an mga ine, tungod nga puydi ine magin mas “notorious” pa tungod nga haligot mangud la iton sentinsiya han krimen nga theft, hold-up, ngan robbery.
Dugang pa ni Manuta nga halarum iton gin ugatan hiton mga krimen, kun diin kawarayan ngan kakulangan an ginkikita nga rason hine.
Nagpahimatngun gihapon ine ha mga molupyo nga likayan iton pagpapatabis ha gawas ngan ha mga magsirom o mga waray suga nga parte han siyudad, ngan pamaghirot pirme para malikayan iton mga tawo nga mayda malain nga intensiyon.
