TACLOBAN CITY – Naatubang yana an Alkalde han Burauen, Leyte ha kaso nga may kalabutan ha Iligal nga Tupada.
Ginpasakahan hin kaso ha Office of the Special Prosecutor hi Burauen, Leyte Mayor Fe Sudario-Renomeron hin Illegal Cockfighting nga kun diin nakakitaan nga tumalapas ha Presidential Decree 449 o an Cockfighting Law of 1974.
Ginpasakahan liwat hin Two counts para han mao nga kaso an Sanggunian Bayan members nga hira David Alcober, Felipe Coral Jr., Antonio Tan, Luis Marlon Torres, Benoni Pocpoc, Ed Gabriel Guimba, ngan Roger Serdoncillo mahitungod ha pagkunsinte hini ha pagpapabulang han mao nga lugar bisan nga diri man Legal nga Holiday, Dominggo o di man ngani Piyesta.
Nabaruan nga subay ha Municipal Resolution of 2008 ha Burauen, Leyte, gin-aprubahan hini an regular nga pagbuhat hin Tupada ha adlaw han Martes, Biyernes ngan Sabado labot pa nga ma-revise an pagtugot ha adlaw han Miyerkules.
