TACLOBAN CITY – Talihas ha mga nagawas nga guidelines nga nakapaurit ha mga residente han Siyudad hiton Tacloban, ginklaro ni Konsehal Neil Glova nga mas masusunod an masterlist kontra ha guidelines nga ginpagawas han Department of Social Welfare and Development o kun DSWD.
Sumala kan Konsehal Glova, an masterlist man gud in ginreview, gin-abuyunan, ngan ginpirmahan han City Council nga kun diin, an mga nakalista in matatagan hin Emergency Shelter ASssitance o kun ESA ngan waray guidelines nga susundon ha panhatag hini.
Dugang pa ni Glova, an budget para ha ESA in P1.92 Billion para ha 31,544 nga pamilya nga partially damaged samtang 25,895 naman an mga totally damaged nga pamilya ha Siyudad hiton Tacloban.Makakakarawat hin P10,000 an partially ngan P30,000 naman para ha mga totally damaged.
Samtang, diri naman matatagan an mga pamilya nga nag-uukoy ha No Build Zone hini nga ESA kay hira in tatagan hin permanente nga pabalay nga nagkakantidad hin P292,000 an kada usa api na an tuna.
Karuyag sidngon hini, tanan nga nakalista ha master list in matatagan bisan pa man ini empleyado hin pribado o pampubliko nga kompanya ngan nagswesweldo hin P15,000 pahitaas.
