TACLOBAN CITY – Mapaso nga pagtapo an nakarawat han mga turista nga sakay han the Coral Geographer tikang ha mga taga Maripipi, Biliran, han pagbisita han mga ini ha mao nga lugar dida han nakalabay nga Nobyembre 4.
“All-out cultural adventure” an naeksperyensiyahan han mga turista han pag-abot nira ha mao nga isla kun diin, nagbuhat hira hin shore excursion ngan nagpakadto ha mga barangay agud makita nira an proseso han paghimo han daba o clay-pot nga usa nga pakabuhi ngan pangilal-an han mga taga-Maripipi.
Nakita gihapon han mga langyawanon an simple ngan malipayon nga pamumuhi han mga residente han Maripipi ngan sugad man an ira kultura nga maypaghisumpay han pangisda ngan panagat.
Labot la hini in gintilawan gihapon han mga turista an mga pagkaon nga matitilawan la ha mao nga lugar sugad hiton Sinagingan ngan sugad man mga pagkaon nga ginluto pinaagi han daba.
Sumala naman kan Maripipi Municipal Mayor Joseph Caingcoy nga ginkakalipay niya nga utro nga napili an Maripipi han cruise ship kun diin, dako iton mabubulig hini nga programa agud makilala ngan maparibhong pa an turismo ngan ekonomiya han lugar.
Manunumduman nga ginbisita anay han Coral Geographer an bungto han Biri ngan La Laguna Mangrove Eco Park ha bungto han Lavezares didto ha Northern Samar dida han nakalabay nga Oktubre 30, ngan gin sundan naman ini han isla hiton Higatangan han bungto han Naval han Oktubre 31 ugsa bumisita ha isla han Maripipi ngan Sambawan.
