TACLOBAN CITY– Ginpahimatngunan han mga manbaralaod hiton syudad an mga tricycle driver, nga namamasada nga mga singabot ha panukot hiton pamasahe.
Sumala kan Hon. Leo Bahin, City Councilor hiton Tacloban, nga personal hiya nga naka-karawat hin reklamo kasumpay han over charge nga pamasahe nga ginsusukot han mga tricycle driver, partikular na kun mayda mga aktibidadis hiton syudad.
Dugang pa hine, nga mayda posible nga ka-atubangon nga mga penalidad an nasabi nga mga driver ngan operator.
Ginmalatumat naman hine, nga makikipaghimangraw hiya ha TOMECO, ngan City Liscensing Office, agud nga magbug-os hin plano kun pati-unano mapupugngan an paningabot hine nga mga motorista.
Mababaruan, damo an namamagreklamo nga mga pasaheros partikular na an mga napakadto ha Leyte Park matungod nga haros 4 ka pilo an gindoble tikang ha minimum fare nga ginpapatuman hapagkayana.
Naghatag naman ine hin suhestyon ha publiko, nga pananglitan maka-engkwentro an mga ine hin sugad nga panhitbo in kuha-on an plate number han ginsakyan nga motor ngan dayon nga igreport ha TOMECO ngan City Liscensing Office agud nga matagan hin dayon nga aksyon.
