TACLOBAN CITY – Abre na para ha mga mabisita nga turista an Mahagnao Volcano Natural Park (MVNP) nga namumutang ha bungto han Buraeun, Leyte.
Una hini, han nakalabay nga Mayo 15 ginlunsar han tourism office han Burauen an ira gintatawag nga “Tanguile Trail” kon diin ha immersion han mga bisita makikit-an an damo ngan dagko nga mga puno hin tanguile.
Ha katapusan naman hini in makikit-an an Malagsum Lake, usa ha tulo nga mga lawa ha Mahagnao, kun diin ini in usa nga sanctuary han mga wild ducks ngan iba pa nga species.
Sumala kan Myrna Agustin, presidente han Mahagnao Volcano Natural Park ecotourism association, nagtutuo hira nga ini nga bag-o nga aktibidad ha ira lugar in maghahatag hin maupay nga kabubuwason ha ira nga mga locals nga nasanay ha pagtanom kumo ira panginabuhi.
Nag-agi daw gihapon hin iba iba nga mga trainings an 34 nga myembro han ira organisasyon kumo preparasyon ha paglunsar han ira tour package ngan pagkarawat hin mga bisita.
Dugang pa hini nga an LGU han Burauen in nag-alutaga hin pira kamilyones nga kantidad para han pagdevelop han mao nga ecotourism site ha luyo han hulga han COVID-19 pandemic.
Plano gihapon han LGU nga magtindog hin bird hide harani ha Lake Malagsum para matagan hin oportunidad an mga bird lovers nga makit-an an mga wild ducks ngan mga tamsi nga diri nadidistorbo an ira natural habitat
