TACLOBAN CITY – Ginklaro han Office of Civil Defense (OCD) Regional Office 8 nga waray sadang nga igkabaraka han publiko bahin han ginkakahadlukan nga posibilidad han pagbuto han Mahagnao Volcano ha Burauen Leyte.
Una hini, nagdurot hin kabaraka ha mga residente ngan publiko an naireport nga daw may mga iregularidad han aktibidad han mao nga bulkan.
Sumala kan Rayden Cabrigas, tagapagyakan OCD 8 nga padayon an monitoring han PHIVOLCS ha mao nga bulkan ngan waray gihapon may nahihipatik nga mga volcanic activity ha lugar nga pwede magdurot hin pagbuto.
Ginklaro hini nga an mga gutak ha mga karsada in durot han mga naglabay nga linog nga nahipatik pero waray sadang nga ikabaraka an publiko.
Gintagan gihapon hini hin duon nga an PHIVOLCS an sakto nga otoridad nga nagpapagawas hin impormasyon bahin han volcanic activities ngan sugadman an mga linog.
Nagpahimatngon naman an OCD ha publiko nga dire magpanic lugod in maging andam ngan batasanon an pamati ha mga radyo, telebisyon ngan mga hintutuinan agud nga mahibaro ha mga angay buhaton ha oras hin kalamidad.
