TACLOBAN CITY – Maabot ha P340,000 nga kantidad hin illegal nga droga an nakumpiskar han mga otoridad ha ira gindumara nga drug buy bust operation ha usa nga drug suspect ha Brgy. Conalum, Inopacan Leyte.
Una hini, ginkilala an mao nga suspetsado nga hi James Punay, 36 anyos an pangidaron, usa nga collector ngan residente han mao nga bungto.
Sumala kan PLt. Daisy Hallasgo, OIC Chief of Police han Inopacan MPS, ha ginpangunahan nga buy bust operation han PDEA 8, napalit han poseur buyer tikang ha suspek an usa ka-sachet hin gintutuuhan nga shabu.
Nakumpiskar pa ha posisyon hini an lima nga medium size sachet hin gintutuuhan nga shabu ngan usa nga P1000 bill nga gingamit nga buy bust money.
Umabot ha 50 grams an nakumpiskar nga illegal nga droga ngan may estimated street value nga P340,000.
Ha pagkayana in naatubang na an suspek ha kaso nga pagtalapas han Sec. 5 ngan 11 Article II han RA 9165 o an Comprehensive Dangerous Drugs Act of 2002.
