Usa nga tulay ha rehiyon ha Thessaly ha Greece an lumaprak dida han 2023 mahuman an duro nga pagbaha, an padayon la gihapon nga ginagamit han mga lokal nga motorista ha kaluyo han klaro nga kadelikaduhan nga dara hini.
Dida han Setyembre 2023, naglusarbo sn Storm Daniel ha Greece, Bulgaria, ngan Turkey, nga nagbilin hin yinukot-yukot nga namatay ngan bilyones ka-dolyar nga danyos ha imprastraktura.
Duro nga naigo an rehiyon han Thessaly, kun diin 79 nga tulay an naruba ngan dire na magamit mahitungod ha haluag nga baha. Usa ha mga nalasurbo han bagyo in an Palaiopyrgos bridge, nga lumaprak ha mismo butnga nga parte hini.
Ginsusumpay han tulay an mga munisipalidad han Tempi ngan Agia, sanglit ini an usa ha pinakaimportante nga ruta para ha mga lokal nga residente.
Ha presente, kapansin-pansin an paglunod han istraktura kun diin an butnga nga parte in pira ka-pulgada nala an kahirayo tikang ha tubig han Pineios River. Sugadman, an pagkaruba hini in waray nagin ayat ha agud pugngan an mga motorista nga padayon nga gamiuton an tulay.
Opisyal na nga gindeklara nga lumapral an Palaiopyrgos bridge dida han 2023 pero mahitungod nga waray ini butangi hin balabag ngan libre nga nakakaagi an mga tawo nga ginpipili nga talapason an mga karatula nga nagbabawal ha pagtabok para ha ira kalugaringon katalwasan.
