TACLOBAN CITY- Diri nababaraka an kapulisan ha luyo han nahihipatik nga pang-atake han mga rebelde nga grupo ha Sinirangan Bisayas.
Sumala kan Police Senior Superintendent Norberto Tuazon, tagmangulo han Leyte Police Provincial Office (LPPO) nga kadaan na ini nga modus han mga walhon nga grupo ngan diri gud angay nga igkahadlok.
Guinpahayag naman ni Tuazon nga naka full alert status an ira mga kapulisan ha pagkayana agud malikayan an bisan ano nga pang atake.
Guinpakurukusog han kapulisan an ira pagdumara hin checkpoint, pagpatrolya ngan hul-os nga pakipagkoordinar ha mga kasundaluhan ha rehiyon.
Samtang, nanawagan naman ha publiko hi Tuazon nga maging mabinantayon ala kontra ha mga dudable nga katawhan ngan diri mag-alang ha pagpasabot ha mga kapulisan.
