Waray kapugngi han aktres nga hi Lotlot de Leon an iya emosyon han diretsahan hini nga ginbaton an bugto nga hi Ian de Leon kasumpay han sayop nga pahayag hini kabahin han nabilin nga propyedad han ira nanay, an tumalikod na ha kadayunan nga Superstar ngan National Artist nga hi Nora Aunor.
Ha story conference han pelikula nga “40 Days,” maduon nga ginpanhimuwa ni Lotlot an alegasyon nga hiya ngan an iba pa nira nga mga bugto nga hira Matet, Kenneth, ngan Kiko in mayda interes ha anuman nga nabilin nga propyedad han batikan nga aktres.
Ginbuhat ni Lotlot an pahayag mahuman an nagin interview ni Ian kan Boy Abunda, kun diin ginmalatumat hini nga naipahibaro ha iya kabugtuan an plano nga magbug-os hin usa nga one-person corporation (OPC) nga makapot ha pamana ngan legasiya ni Nora.
Mababaruan nga hi Ian an gintudlok nga magmangulo han nasabi nga korporasyon kumo legal heir, samtang dire kaupod an iya kabugtuan nga ampo han iya nanay.
Waray gihapon kapugngi han aktres nga magluha samtang ginhihinumdom an relasyon nira ni Ian ngan an bilin ha iya han ira nanay.
Sumala kan Lotlot, hiya pa mismo an dumaop kan Ian dida han ika-40 kaadlaw mahuman nga tumalikod ha kadayunan hi Nora Aunor agud pag-istoryahan an posibilidad han pagbug-os hin usa nga korporasyon nga manginginano ha nabayaan nga legasiya han ira nanay.
Dugang pa hini, dire ini para ha personal nga pakatagamtam kundi agud igpadayon an adbokasiya ni Aunor nga bumulig ha mga nanginginahanglan.
