TACLOBAN CITY – Nagbug-os hin komite nga magbabantay ha pagkiwa han pamasahe ha mga pampubliko nga sarakyan an Leyte Normal University – Supreme Student Council.
An komite in gintatawag nga Committee on Student Transporation and Fare Monitoring (CSTFM), kun diin panuyo hini nga panginanuon kun mayda mga paghitaas nga nahitatabo ha pamasahe han mga panakayan, labi na adton mga ginsasakyan han mga istudyante han ira iskuylahan ngan agud mahibaruan kun nakakaapekto ini ha pag-aram han mga istudyante.
Sumala kan Leyte Normal University-Supreme Student Council President, Jon Ivan Torreros, haros 86% han ira mga istudyante an naghangyo nga himuon asynchronous o online an ira klase mahitungod han kamahal han pasahe nga ira ginbabayad para kumadto ha iskuylahan, resulta han paghitaas han presyo han lana kadungan han kasamok ha Middle East.
Dugang pa ni Torreros, an nasabi nga porsyento in pamatuod la nga mabug-at ngan dire na naa-akos han mga istudyante an mga pag-umento nga nahitababo labi na kada-adlaw an mga ini napakadto ha iskuylahan ngan napasahe—mapa-tricycle man o bisan anu nga klase hin Public Utility Vehicle (PUVs).
Basar han datos nga ira nakuha, dire paprehas an mga umento nga iginpapatuman han mga pampubliko nga transportasyon, mayda naabot P3-10 ha sulod han syudad han Tacloban ngan naabot naman ha P50-P100 para han tikang ha gawas han sydudad—depende han klase han PUV.
Subay pa ha datos, 71% han mga istudyante han LNU in direkta nga apektado han gastos ha pamasahe, kun diin ha nasabi nga ihap in 36% ha mga ini an dormers o nagbo-boarding house nga kada-semana nga nagbi-biyahe, 35% an nagbibiyahe kada-adlaw nga tikang ha gawas han Tacloban, ngan 22% naman an nag-uukoy ha sulod la han syudad.
Nagawas gihapon ha gindumara nga survey nga kaurugan han mga istudyante in ginpipili an online class ngan blended learning, kun diin 56% an pumabor nga himuon nga online an klase yana nga adlaw, Abril 1, 33% naman an pumabor ha blended learning, ngan 11% la an kumaruyag nga igpabilin nga face-to-face an klase.
Gin malatumat gihapon ni Torreros nga kada semana an ira pagdumara hhin survey agud mahibaruan an opinyon han mga istudyante.
Waray naman petsa o durasyon kun kutob san-o an pagdumara han sinemana nga survey.
