NATIONAL – Dire na karuyag nga maki-api pa ni Senate President Francis “Chiz” Escudero ha nagin diskusyon nira Vice President Sara Duterte ngan Senadora Risa Hontiveros.
Ine in mahuman an nagin mapaso nga batunay hine dida han nakalabay nga adlaw samtang ginhihingadayan an 2025 proposed national budget han Office of the Vice President.
Sugadman, ginmalatumat ni Escuderos nga mayda valid nga pakiana hi Hontiveros kumo kaparte ha gihapon han mandatos han Kongreso nga busisi-on an pondo han mga ahensya han gobyerno.
Han mapakianhan hi Escuderos kun makaka-apekto ba an desisyon han Senado kumo institusyon ha magigin pondo han OVP ha nahitabo nga batunay nira VP Sara ngan Sen. Hontiveros, baton hine, in dire daw ine dapat haluan hin emosyon.
Samtang, nagsagdon naman hi Escudero ha mga tagmangulo han ahensya han gobyerno nga magkamay-ada hin pasensya kun nabaton ha pakiana han mga magbabalaod mahitungod nga konektado ine ha trabaho han Kongreso.
Bug-os naman an pagtapod ni Escudero ha Chairman han Committee on Finance nga hi Senadora Grace Poe nga kakayahon hine nga pagmanguluhan an magkaduru-dilain nga ahensya han gobyerno.
