TACLOBAN CITY – Igin anunsyo han Provincial Government of Leyte pinaagi han Provincial Tourism Office nga mayda ini libre nga film screenings pati gihapon photo exhibit may paghisumpay han Japanese occupation ha nasud durante han World War II nga kun diin, abre ini tikang alas-9 han aga kutob alas 6:40PM ha MacArthur Landing Memorial National Park view deck ha bungto han Palo, Leyte.
Makikit-an an documentary film nga ‘Honor: The Legacy of Jose Abad Santos’ ha Oktubre 4,7,10,13,16, ngan 19 nga kun diin, istorya ini han anay Supreme Court Chief Justice nga ginpatay han mga Japanese forces mahitungod han diri ini pagtugot ngan makipag koopirar ha ira samtang nagseserbi kumo acting president han Philippine Commenwealth.
Puydi gihapon kitaon an ‘Quezon’s Game’ ha Oktubre 5,8,11,14, ngan 17 nga istorya naman kun papatiunanhon nga hi President Manuel L. Quezon in nag offer hin refuge ha 1,200 nga tumakas han Nazi occupation ha Germany.
Igpapasalida naman ha Oktubre 6,9,12,15, ngan 18 an ‘Aishite Imasu’ nga kun diin, nalibot ini ha mga hinumdom han mga guerilla durante han Japanese occupation.
Labot la naman han film screenings, in makikit-an an mga litrato durante han Leyte’s Liberation Period ngan pati gihapon an mga portraits han napulo nga surviving World War II veterans pinaagi han photo exhibit han mga ini.
Para han kumpleto nga detalye in bisitaha la an opisyal nga Facebook page han Leyte Gulf Landings Commemoration.
