ORMOC CITY – Ginpahayag ni Leyte 4th District Representative Richard Gomez an iya plano nga ig-refile an house bill nga may panuyuan nga himuon nga legal an paggamit han medical marijuana ha bug-os nga nasud.
Sumala kan Gomez, dako an papel hine nga panukala mahitungod han benepisyo han medical marijuana para han mga pasyente nga may-ada sakit sugad han Alzheimer’s disease ngan cancer.
Ginklaro gihapon ni Gomez nga normal la ha proseso han pagbabalik o pag-refile han panukala an pag-eksister han mga sektor nga kontra han nasabi nga plano.
May-ada permi pro ngan con, ngan ngatanan ini in ginkokonsidera han komite, rason han pagkakamay-ada hin halarom nga diskusyon ngan pag-aram ugsa magdesisyon.
Manunumduman nga an nasabi nga bill in naipasa na ha House of Representatives durante han 9th Congress, pero waray ini kaaprubahi han Senado mahuman matapos an sesyon.
Mahitungod hine, personal nga nagsalawad utro hi Gomez han bill agud magpadayon an deliberasyon ha bag-o nga Kongreso.
Naglalaum naman ine nga magkakamay-ada hin mas damo nga suporta ngan mahugot nga paghingaday an balaudnon agud masigurado nga makakabaton ine ha panginahanglan han mga pasyente ngan maproteksyunan an seguridad han publiko. (via Bombo Shiela)
