TACLOBAN CITY – Patay an usa nga lalaki mahuman nga pagpamumusilon han waray pa kakilal-i nga mga suspek harani ha merkado publiko han Poblacion District 3 Barugo, Leyte.
Sumala kan Pol/S Master Sgt. Alberto Suico, duty investigator han Barugo Municipal Police Station, ginkilala an biktima nga hi Valentino Alvino Aruta, Jr., ada ha sakto nga pangidaron ngan residente han mao nga barangay.
Dugang pa hini nga pakuriay an imbestigasyon nga ira ginbubuhat ha pagkayana tungod nga waray testigos nga dumangop ha ira ngan sugadman dire gihapon klaro ha kuha han cctv camera an nagpapaluyo han mao nga krimen.
Nahisabutan naman nga an mao nga biktima in may pending nga kaso nga may kalabutan ha ilegal nga droga ngan una na gihapon ini nga ginpailarom hah rehab.
Subay ha pamakiana han mga kapulisan in waray naman kaaway o kadelito an mao nga biktima ngan waray gihapon ini nakarawat nga hulga ha iya kinabuhi san-o mahitabo an insidente.
