TACLOBAN CITY – Usa nga lalaki an nagprubar hin paghikalulusot ha COMELEC checkpoint ha may National Highway Brgy. 10 Lawaan Eastern Samar dida han kagaahon han nakalabay nga adlaw, an naaresto han mga otoridad kun diin nakuhaan gihapon ine hin gin aalegar nga shabu.
Ginkilala an suspek alyas Jayson, 38 anyos an pangidaron, ngan residente han Brgy. Tinabanan, Marabut, Samar.
Sumala kan Lawaan Municipal Police Station Officer-In Charge, PLt. Jonathan Rivas, nagprubar ine paglusot ha nauuna nga passenger van pero natapo ine han rear security team nga nakadto ha may katapusan han checkpoint.
Subay ha rebelasyon han suspek, kahuhuman pala nira magkita han iya buyer nga taga-Borongan City ha ira meeting place—ha General MacArthur, Eastern Samar; ngan tipauli na unta ine ha Brgy. Tinabanan, Marabut, Samar han umagi ine ha nasabi nga checkpoint kun diin ine nagprubar paglusot.
Dida han kadakop han suspek in gin aruan ine hin lisensya ngan papel han iya motor pero waray ine may naipakita ha mga otoridad.
Gin aro gihapon an sling bag nga sul-ot hine pero waray ine ighahatag han suspek ngan dida han kakuha na hine in didto nakuha ha suspek an pira ka-sachet han gin aalegar nga shabu, kwarta nga maabot ha sobra P6,000, lighter, gunting, national ID, ngan pira pa nga drug paraphernalias.
Nakapaslak naman na an suspek ngan mag aatubang ha kaangayan nga kaso.
