NATIONAL NEWS– Ginkompirma han mga hintutuinan nga ahensya hiton gobyerno nga wara hira kapot nga listahan hiton mga ngaran han mga benepisyaryo han Ayuda sa Kapos ang Kita o AKAP Program ha kaluyo nga nag-roll out na ine han nakalabay nga tuig.
Ha hearing han Senate Committee on Social Justice, Welfare and Rural Development, ginsukna ni Senadora Imee Marcos an Department of Labor and Employment (DOLE) ngan Department of Social Welfare and Development (DSWD) kasumpay ha kawaray listahan hiton mga ngaran han mga minimum ngan below minimum wage earners nga tatagan han ayuda.
Ginpahayag ni DOLE Undersecretary Benjo Santos Benavidez, nga waray hira ngaran hiton mga empleyado, nga na-sweldo hin minimum ngan an datos la nga mayda hira in kun pira an mga minimum wage earners.
Dugang pa hine, mayda ginhihimo nga proseso para mahibaryan kun hira hino an nasweldo hin minimum ha mga kumpanya ngan usa na dinhi an ginhimo nga survey han Philippine Statistics Authority (PSA) ha kada kumpanya kun diin ada ha 5 milyon an naitala nga minimum wage nga mga empleyado.
Ine an nagin kompirmasyon ni DSWD Undersecretary Aliah Dimaporo nga waray hira listahan hiton mga ngaran han benepisyaryo para ha AKAP Program.
Nanindugan pa hi Dimaporo, nga ha kaluyo han kawaray listahan, may guidelines ngan requirements para ha mga maka-karawat hiton AKAP.
