BABATNGON, LEYTE – Samaran an usa nga lalaki mahuman nga tigbason ha Brgy. San Isidro, Babatngon, Leyte.
Ginkilala an biktima kan alyas Jan, 24-anyos, residente han nasabi nga barangay, samtang an suspek naman in ginkilala kan alyas Noel, 20-anyos, ngan residente han kaparehas nga barangay.
Sumala kan Babatngon Municipal Police Station Officer-in-Charge, Renerio Sister, naghahawid na unta an biktima ha bugto hine ngan han suspek han ine an maigo han panigbas.
Basar han imbestigasyon, nagpipinabuto hin paburuthon nga piccolo an suspek ngan gin iitsa ha mga umaragi kun diin nahisakto naman nga umagi an bugto han biktima ngan naitsahan han pabuto kun diin nagkamay-ada an mga ine hin mapaso nga argumento ngan nasuntok an bugto han biktima.
Umuli naman ha ira balay an bugto han biktima ngan bumalik gihapon pero kaupod na an biktima ngan gingubat an balay han suspek.
Ha pag-abot han biktima ngan bugto hine ha balay han suspek, gin aalegar nga gin kastigo daw han mga hine an kag-anak han suspek kun diin umugop an suspek ha iya kag-anak ngan kumuha hin sundang ngan gintigbas an mga ine pero an naigo in an biktima nga daw naghahawid la han panhitabo.
Nag-angkon naman hin tinigbasan ha may ulo an biktima.
Dayun naman nga gindara ha hospital an biktima paara han kadagmitan nga pagtambal.
Samtang, naaresto naman an suspek ngan narekober an sundang nga ginamit hine.
Papasakahan naman hin kaso nga frustrated murder an suspek.
