TACLOBAN CITY – Kadungan han pagbisita ni Presidente Ferdinand Bongbong Marcos Jr. ha Sinirangan Bisayas kakulop nga adlaw, Hulyo 4, 2024 in gindumara gihapon an LAB FOR ALL Program nga ginpangunahan naman ni First Lady Louise Araneta-Marcos ha People Center and Library, Tacloban City.
Sobra 2000 nga mga indibidwal an naka avail han mga magkadurudilain nga mga serbisyo hin libre pinaagi han mga magkadurudilain nga mga ahensya han gobyerno ngan mga partners ha pribado nga sektor.
Lakip ha mga serbisyo nga naavail han mga ini in an libre nga laboratoryo, pangonsulta ngan medisina, ngan iba pa.
Sumala kan First Lady Louise Araneta-Marcos, nga panuyo han programa nga igpahirani ha publiko an serbisyo han gobyerno in labi na ha mga sidsid nga mga komunidad.
Dugang pa han First Lady nga ini nga programa in brainchild niya ngan an iya asawa nga hi Presidente Marcos.
“Ang LAB FOR ALL Program ho namin ay brainchild namin ito ng Asawa ko. Ang sinabi ng asawa ko, we should bring government services closer to the people not the other way around.” yakan han unang ginang.
Regalo daw gihapon ini nga programa han iya biyenan nga taga Sinirangan Bisayas nga nagsalin-urog naman han iya kaadlawon han nakalabay nga adlaw.
“Speaking of family, alam naman ninyo na ito ang province ng aking Biyenan. Diba sabi Ma’am Imelda at sabi niya na pupunta kami dito ngayon birthday gift niya sa inyong lahat.”
Gindayaw naman ni Leyte 1st District Representative ngan House Speaker Martin Romualdez an mao nga inisyatiba nga an panuyo in makagdara hin libre nga serbisyo medikal ha mga kablas.
“Ang Lab for All caravan ay isang mahalagang inisyatiba ng ating mahal na Pangulong Ferdinand Marcos Jr. at ng ating masipag na First Lady. Layunin ng proyektong ito na maghatid ng libreng konsultasyon, X-ray, laboratory tests, at gamot sa mga komunidad na nangangailangan,” an kaparte han nagin pahayag ni Romualdez.
“Ang proyekto pong ito ay may malalim na epekto at kahalagahan para sa ating mga kababayang Pilipino. Marami sa ating mga kababayan, lalo na sa mga malalayong lugar, ang walang sapat na access sa mga serbisyong medikal. Dahil dito, madalas na napapabayaan ang kanilang kalusugan,” dugang pa ni Romualdez.
Libre nga nakatagamtam an mga Taclobanon ha serbisyo han Department of Health, PhilHealth, Department of Social Welfare and Development, Department of Agriculture, Technical Education and Skills Development Authority, Department of Trade and Industry, Public Attorney’s Office, Philippine Charity Sweepstakes Office ngan an Go Negosyo.
Mayda gihapon purlo minus P2-Million nga kantidad an ginpanhatag ha mga estudyante han Commission on Higher Education pinaagi han Tertiary Education Subsidy ngan Tulong Dunong Program.
An LAB in Libreng Laboratoryo, Konsulta at Gamot para sa Lahat nga kun diin, naglibot na gihapon ini ha mga magkadurudilain pa mga mga probinsya ha bug-os nga nasud.
