NATIONAL – Igin-buyagyag han self-confessed drug lord nga hi Kerwin Espinosa, nga hi Senador Ronald “Bato” dela Rosa an nagduon kan anay senadora Leila de Lima ngan ha negosyante nga hi Peter Lim ha illegal drug trade.
Ine in igin-buyagyag ni Espinosa han umatubang ine ha hearing han quad comm kasumpay ha extrajudicial killings (EJK) ha war on drugs han Duterte administration.
Sumala kan Espinosa nga gintarhog pa hiya ni Bato nga kun diri hiya masunod ha plano in matatabo gihapon ha iya an gindangatan han iya nawara nga amay nga hi anay Albuera, Leyte Mayor Rolando Espinosa, nga ginpatay samtang ine in nakadto ha sakob han presuhan.
Kun manunumduman nga hi Rolando Espinosa in kaparte ha narcolist ni anay Presidente Rodrigo Duterte nga kun diin napusil ine han mga tawuhan han Criminal Investigation and Detection Group ngan namatay ha sakob han iya presuhan ha Baybay Sub-Provincial Jail dida han Nobyembre 5, 2016, mahuman an gin-aalegar nga shootout incident.
Mahuman an nagin pagbuyagyag ni Espinosa in nangaro ine hin pasaylo kan De Lima mahuman nga mahidabi ine ha iligal nga droga.
