TACLOBAN CITY – Ginpahayag han Tacloban City Health Office nga dako an igin-ubos ha ihap han mga positive cases han COVID-19 ha siyudad.
Sumala kan Dra. Gloria Fabrigas, head han City Health Office, nga tikang ha 58 nga mga kumpirmado nga kaso ada na ha 55 nga pasyente an mga nakarecover ngan nagpakauli na ha ira tagsa-tagsa nga pamilya.
Samtang an nabibilin naman nga 3 in nagpapabilin pa ha isolation facility ngan padayon nga ginmomonitor.
Ha luyo han dako nga igin-ubos han COVID cases ha siyudad, nanawagan naman an mao nga opisyal ha publiko nga diri magpakampante ngan mahugot la gihapon nga magsunod ha mga ginpapatuman nga health protocols.
Ha pagkayana in nangangandaman liwat hira ha mga magkakaabot nga mga Local Stranded Individual (LSIs).
