ODD NEWS – Naatubang yana ha kaso nga murder an usa nga karnero ha South Sudan ha Africa, mahuman nga masentensyahan nga guilty ha pagpatay ha usa nga 45 anyos nga babaye ha mao nga nasud.
Basar ha report han local media, gin aresto han mga otoridad an mao nga hayop mahuman ini nga masirutan hin tulo katuig nga kapresuhan, tungod han pagsungay hini ha babaye nga hi Adhieu Chaping nga nagresulta han dayon hini nga kamatayon.
Sumala naman ha mga otoridad, dire pwede nga basulon an tag iya han karnero tungod nga waray naman ini kalabutang ha mao nga insidente pero sugadman, kumo danyos ngan perwisyo ha pamilya han biktima, ginkikinahanglan hini nga maghatag hin lima nga baka ha mga ini.
Samtang, tulo katuig naman nga igpripriso an suspek nga karnero ha usa nga military camp ha Aduel County, ngan pagkahuman hini in ighahatag na ini ha pamilya han biktima.
