SOUTHERN LEYTE – Maabot ha 2,373 family food packs an malinampuson nga naipanhatag han provincial government han Southern Leyte ha unom nga LGUs han probinsya sugad han Maasin City, Bontoc, Malitbog, Silago, Saint Bernard, ngan Hinunangan.
Samtang, padayon naman nga namamalit ngan nagdudugang pa hin kadugangan pa nga food packs an nasabi nga probinsya para ha mga residente, nga nagkakantidad hin P15-M ngada ha P17-M pinaagi han Quick Response Fund.
Sumala kan Southern Leyte Governor Damian Mercado, kahuman han pag lasurbo ni bagyong Tino ha nasabi nga probinsya in dayon nga igin deliver han lokal nga panggobyernohan an mga naka-preposition nga food packs tikadto ha mga munisipalidad ha kaluyo nga nadelatar ine ka-ihatag ha mga munisipalidad mahitungod ha mga karsada nga diri maagian.
Samtang, nangaro naman hin despensa ngan pag intindi an mao nga gobernador ha mga mulupyo nga diri matatagan hin food packs mahitungod nga an pondo han probinsya in kulang rason nga an mga duro nga naapektaran la han bagyo an igpa-prayoridad ngan uunahon anay.
Gin malatumat naman hini nga may-ada ig papadangat nga hinabang an nasyonal nga panggobyernohan para ha mga mulupyo han Southern Leyte.
Umabot ha 49,000 nga pamilya o 183,705 nga mga indibidwal an kabugosan nga ihap han mga nag-bakwit tikang ha probinsya han Southern Leyte dida han Bagyong Tino.
Kun diin, umabot ha upat an naitala nga casualties ha mao nga probinsya tikang ha mga munisipalidad; usa tikang ha Saint Bernard, usa an tikang ha Libagon, usa tikang ha Liloan, ngan duha naman an tikang ha Sogod.
Aada pa naman ha pito ka pamilya an padayon nga nag uukoy ha evacuation area ha munisipalidad han Silago, Southern Leyte samtang an iba naman in dayon nga nanguli ha ira mga tagsa-tagsa nga balay agud ayuson an ira mga panimalay. (via Bombo Niña Magpili)
