Usa nga 19-anyos nga busag nga mustang nga nagngangaran hin Gringo ngan an iya trainer nga hi Lauryn Zepeda an opisyal nga nakaghipatik hin Guinness World Record para ha titulo nga “most tricks performed by a horse in three minutes”.
Nahipatik hira an nakakabilin nga 38 tricks ha sulod la han 2 minutes and 47 seconds dida han Marso 5.
Sumala kan Zepeda, igin anak nga wild horse hi Gringo ugsa ini gin ampon tikang ha gobyerno. Napulo katuig na hira nga nagpe-perform, ngan imbes nga gumamit hin tradisyunal ngan kaurugan in marahas nga paagi ha pagtutdo han kabayo, gumamit hiya hin clicker training ngan mga treats nga kaurugan ginbubuhat ha mga ayam.
Mahitungod hini, dire ginkokonsidera ni Gringo nga trabaho an iya ginbubuhat kundi usa nga mulay nga pirme mayda kabalyo nga crackers.
Mahugot na nagin aludayday han Guinness ha nasabi nga record attempt.
Dire pwede kaptan ni Zepeda an kabayo ngan boses ngan kumpas la an gintutugutan. Kaupod ha mga nahimo nga tricks ni Gringo in an pagtanggal han taklap ha iya luyo, pagmumulay hin bola, pagwagayway han gutiay nga bandera han USA, pagpapatukar han gudti nga mulayan nga piano, pag-huyop ha trumpeta, ngan magin an pag-pose para ha usa nga selfie ngan pag-‘bow’ ha kaurhian han routine.
Agud iginselebrar an ira kalangpusan, nag-andam hira hin mga tacos ngan cake para ha mga tawo ngan para kan Gringo,
Sumala kan Zepeda, an record in nagpapamatuod nga mayda mga makatawo nga pamaagi ha pagtututdo han tricks nga mga kabayo, ngan mas magigin masugot an mga hayop kun mapapabilin ini nga malipayon ngan dire pinirit.
