Nagpaagwas hin maisog nga pahayag hi Iran Parliament Speaker Mohammad Bagher Ghalibaf mahuman bumalik ha Iran tikang ha Pakistan, kun diin hiya an nanguna ha negosasyon han peace talk ha butnga han Iran ngan Estados Unidos.
Kumo baton ha mga pahayag ni U.S. President Donald Trump, igin duon ni Ghalibaf nga ‘an mga sugad nga panarhog ig waray epekto ha Iranians’ ngan dire hira ‘masurender ha ilarom ha panarhog.’
Subay ha report han Iranian outlets, ginmalatumat hine nga andam an Iran nga bumaton ha anuman nga pahimatngon han Amrika: “If you fight, we will fight, if you come forward with logic, we will respond with logic.”
Dugang pa hini, dire magpapailarom an Iran ha anuman nga klase hin panarhog ngan kun puprubaran utro an ira determinasyon, sumala pa hini, “we will teach them an even greater lesson.”
Ginmalatumat gihapon ni Ghalibaf nga tikang pa ha katikangan han negosasyon, dire na natapod an Tehran ha Estados Unidos ngan kinahanglan ini pagtrabahuan han Amerika mahitungod ha mga ginbuhat nga nauan nga pag-atake ha Iran samtang gindudumara an negosasyon.
Kasunod hini, ginmalatumat ni Trump ha iya mga post ha Truth Social nga magpapatuman an Estados Unidos hin naval blockade ha Strait of Hormuz ngan babalabgan an mga barko nga nagbabayad hin “illegal toll” ha Iran.
Sumala pa hini, padayon gihapon nga lilimpyuhon han US an mga pantalan ha Strait of Hormuz agud masigurado nga talwas nga agos han mga kaalyado nga barko hini.
Syahan na nga ginpahayag han US military nga andam hira utro magdumara hin operasyon kontra ha Iran ha sakto nga oras, samtang nagpapabilin nga waray kasabutan an magkaluyo nga parte kasumpay han nuclear program han Iran.
