TACLOBAN CITY – Naihatag na han ahensiya hiton Philippine Crop Insurance Corporation (PCIC) an mga insurance ha 130,916 nga mga parag-uma ngan paru-pangisda ha sakob han bulan hiton Enero kutob Agosto 15.
Sumala kan Benita Alberto, OIC Marketing and Sales Division hiton PCIC Regional Office VIII, iginkakalipay han ira ahensiya nga naipandestribwer na iton mga insurance ha mga parag-uma ngan paru-pangisda ha rehiyon nga nagka-aapektaran an mga pananom ngan mga kagamitan nga gingagamit panpakabuhi.
Ginpaambit han mao nga opisyal nga naihatag na an government premium subisidy insurance nga P246.7 million ha mga molupyo ha sakob han P358.62 million nga alokasyon para yana nga tuig.
Dugang pa ni Alberto, an nahibibilin nga P111.92 million, in gagamiton para ha iba pa nga mga parag-uma ngan purupangisda nga waray pa makag-avail han free insurance program han mao nga ahensiya.
Samtang, basar naman han ira datos ha Sinirangan Bisayas, ginkikita nga damo an nanguha nga mga parag-uma hin insurance ha Leyte, mahitungod nga damo an naireport nga nagkadadaot nga humay tungod hiton insekto, peste, ngan mga sakit. Kadam-an dinhe in mga taga-District 1-5 ngan ha siyudad hiton Ormoc.
