CARIGARA, LEYTE – Usa nga insidente hin panigbas an nahipatik ha Barangay Manloy, Carigara, Leyte kakulop nga adlaw, Setyembre 12.
Ginkilala an suspek kan alyas Jose, 51-anyos an pangidaron, ngan residente han Barangay Manloy, Carigara, Leyte.
Sumala kan Carigara Municipal Police Station Acting Chief of Police, PMaj. Reymond Quinagutan, nakakarawat hira tawag kasumpay han insidente kun diin dayun naman ine nga gin respondehan han mga kapulisan.
Subay ha inisyal nga imbestigasyon, nagtatagay an suspek ngan biktima ha ligid han karsada han magkamay-ada an mga ine hin mapaso ngan batunay kasumpay han right of way han bag-o nga palit nga lote.
Durante han ira pagbatunay, tigda nga tumukdaw an biktima ngan bumunot hin calibre .45 pistol ngan ginpamusil an suspek, kun diin naigo an suspek makapira kabeses.
Ha kaluyo han inig-an hine, nahimo han suspek nga makabulos dida han mahugot hine an sundang nga nakataklos ha hawak han biktima, kun diin ginamit naman ine han suspek para tigbason an biktima makadamo kabeses.
Dayun naman nga gindara an suspek ngan biktima ha Carigara District Hospital ha Barangay Barugohay Norte pinaagi han barangay emergency vehicle. Pero gindeklara nga dead-on-arrival an biktima, samtang gin balhin naman ha Eastern Visayas Medical Center (EVMC) an suspek ha Tacloban CIty para han mas halarom nga pagtambal.
Samtang, narekober naman ha lugar han insidente an usa nga unit han calibre .45 pistol ngan usa nga magazine, usa nga sundang nga haros 17 inches an kahilaba, ngan lima nga basiyo hin bala han calibre .45.
