TACLOBAN CITY – Maabot ha haros 390 million pesos an naitala nga inisyal nga danyos han bagyong Agaton ha sektor han agrikultura ha bug-os nga rehiyon.
Sumala kan Christine Colasito, tagapagyakan han Department of Agriculture (DA) Regional Office 8, basar ha partial damage report nga ira nakarawat, maabot ha 9, 133 nga mga parag-uma ha rehiyon ngan 4, 921 hectares hin umhanan an naapektaran han naglabay nga bagyong Agaton.
Pinakaapektado naman an mga umhanan hin humay kun diin 4, 269 nga mga parag-uma an nadarahigan ngan umabot ha 169, 947,000 pesos an inisyal nga danyon naitala.
Nahibaruan nga may mga pauna na nga hinabang nga ginhatag han DA ngan mga LGUs ha mga apektado nga parag-uma pero ha pagkayana in padayon pa nira nga ginpapamulat an kabug-usan o pinal nga report bahin han danyos ha agrikultura tungod han bagyong Agaton agud nga makapagplano han rehabilitasyon ngan kadugangan nga hinabang para ha mga ini.
