TACLOBAN CITY – Gindus-og ngada buwas nga adlaw an unta nakatalaan nga pag-implementar han Traffic Operations Management Enforcement and Control Office (TOMECO) han two-way scheme ha Real pakadto Imelda St. ha syudad han Tacloban yana nga adlaw.
Sumala kan Ronnie Cornico, head han TOMECO, waray katuman an pag-implementar han mao nga two-way scheme tungod nga waray katapos kakulop nga adlaw an pagbalyo han mga signages ha mga karsada.
Ginsiguro naman han TOMECO nga mahuman yana nga adlaw an pagbalyo han mao nga mga signages agud nga mga matikangan na buwas an pag-implementar han mao nga skema han trapiko.
Samtang, igpapatuman gihapon han TOMECO an one way scheme ha kada rush hour alas sais ngada alas nuybe hiton aga tikang ha Astrodome tisulod ha Real nga dalan ngan tigawas ha Magallanes.
Magiging one way gihapon an dalan tisulod ha Magallanes tikang ha Astrodome ha kada alas kwatro ngada ala siete hiton kulop.
