TACLOBAN CITY – Umabot ha 128,149 an nagin kabug-usan nga ihap han mga namag-file pagka-kandidato ha bug-os nga rehiyon 8 dida han kahuhuman pala nga filing han Certificate of Candidacy (COCs) dida han nakalabay nga semana, Agosto 28 ngada han Setyembre 2.
Nag iha manggud hin usa kasemana an pamasa han mga aplikasyon pagkakandidato ha bug-os nga nasud kun diin waray na ine tagi hin extension labot nala han iba nga lugar ha Luzon.
Sumala kan Jenette Fariola-Ruedas, Information Officer hiton Commission on Election (COMELEC) Regional Office 8, umabot ha 8,970 an ihap han nagfile pagka-kapitan, 64,194 naman an nag-file para han pagka-membro han Sanggunian Barangaty, samtang, para naman han posisyon han Sk Chairperson in umabot ha 8,466 an nagfile, ngan 46,572 an ihap han nagfile pagka-SK Kagawad.
Nagin mahimyang naman daw an filing han mga COCs ha sulod han unom ka-adlaw nga gintalaan han COMELEC ngan waray gihapon may nagin problema hine labot nala han paghuruot han pira nga mga opisina han COMELEC mahitungod han kadamo han mga aplikante pero ngatanan naman daw han mga ine in naakomodar ngan nakagpasa.
Samtang, ada naman ha 4,147 an kabug-usan nga ihap han mga nagpasa hin aplikasyon pagka-kandidato han bug-os nga syudad hiton Tacloban, 347 han mga ine nadalagan pagka-kapitan, 2,238 an para han pagka-membro han Sanggunian Barangay, 296 naman para han posisyon nga SK Chairperson, ngan 1,276 naman an para han pagka-SK Kagawad.
Sumala kan Atty. Ma. Gorretti Cañas, Election Officer hiton Tacloban City, may-ada pira nga nag-a-apply ha pagka-kandidato an waray na nira ig akomodar mahitungod nga waray an mga ine makaabot ha sakto nga oras.
Ha kabug-usan in nagin manilampuson ngan mahimyang naman daw an nagin dalagan han unom kaadlaw nga filing hiton mga Certificate of Candidacy.
City
