TACLOBAN CITY – Ginpahibaro han Comelec-8 nga gutiay la gihapon an ihap han mga naparehistro para han tiarabot nga barangay ngan SK election ha opisina han COMELEC.
Sumala kan Atty. Ma. Gorretti Cañas, Tacloban City Election Officer, habubo la gihapon an ihap han mga naparehistro ha ira opisina.
Pira daw han mga rason hine in daw bangin nabi-busy pa an mga katawhan ha ira mga trabaho o ha iskuylahan naman para han mga istudyante.
Gin abisuhan gihapon hine an publiko nga kutob la ngada hiton Enero 31 an ira panrehistro ngan waray pa daw ordinansa nga ginhahatag ha ira nga nagpapahalawig han panrehistro.
Magdudumara naman daw hin satellite registration an ira opisina dida hiton masunod nga semana sanglit sarado daw an ira opisina hine nga mga adlaw.
Ha Lunes, Enero 9, in aadto hira ha San Jose National High School; Enero 10, ha Leyte National High School; Enero 11 ha Tacloban City Jail para naman han mga Person Deprived of Liberty (PDLs); Enero 12 ha Northern Tacloban National High School; Enero 13 ha , 2nd floor han usa nga mall ha may Abucay; Enero 14, ha Brgy. 98 Gymnasium ha Camansihay; Enero 18-20 ha usa nga mall ha downtown area ha ira Activity area; ngan Enero 23-31 ha may Marasbaras nga mall.
