Gin hangyo han International Criminal Court (ICC) Prosecution ha mga judges nga igin eksplikar han defense counsel ni anay Presidente Rodrigo Duterte an papel han unom nga Filipino lawyer.
An mga ini in ginkakalakipan nira Attys. Salvador Medialdea, Salvador Panelo, Martin Delgra, Silvestre Bello III, Alfredo Lim, ngan Cesar Dulay.
Ginpakilala an mga ini ni Defense Counsel Nicholas Kaufman nga bumulig ngan sumuporta bisan kun nalingkod la an mga ini ha gallery.
Syahan na nga ginpahayag ni Kaufman nga duha ha mga ini nga hira Medialdea ngan Delgra an nabulig hadto pa man.
Samtang ginkumpirma ni Panelo nga an defense team in nakatalaan nga makighampang ha mga Filipino lawyers agud paghingadayan an estratehiya ha pagdungog.
Ha unom kapahina nga igin pagawas nga mayda petsa nga Marso 6, an pahayag nira Kaufman ngan Panelo in maghahatag hin impresyon nga an unom in membro han defense ni Duterte.
Mahitungod hini, gin hangyo han ICC Pre-Trial Chamber 1 an defense lawyers nga maghaon na an unom nga nahingaranan, nga dire membro han defense team ha kaso.
Karuyag gihapon han prosecutors nga igbutang han defense ha rekord nga an mga abogado in dire makakakarawat hin anuman nga disclosure ha kaso, dire makaka-access ha anuman nga non-public filing ha kaso, dire makakakarawat hin anuman non-public information magpaghisumpay ha kaso, ngan dire entitled ha legally privileged meeting o makighampang hin personal ha anay presidente ha detention center.
Dugang pa han prosekusyon, nakasurat ha Articles 68 han Rome Statute, nga mayda hira katungod nga bumaton agud maproteheran an katalwasan, physical ngan psychological well-being, dignity ngan privacy han biktima ngan mga witnesses.
