Gin pahayag han International Criminal Court (ICC) nga magtutudlok hira hin “common legal representatives” para ha mga biktima han crimes against humanity nga iginpasaka kontra kan anay Presidente Rodrigo Duterte.
Subay ha dokumento han ICC nga mayda petsa nga Pebrero 4, 2026, iginpahibaro han Registry han tribunal ha Pre-Trial Chamber I an opisyal nga pagtutudlok han mga legal nga tinaglawas han mga biktima.
Panuyo hine nga siguraduhon an representasyon han ngatanan han opisyal nga ginkikilala nga biktima ha pagdungog ha kaso.
Dida han Enero 26, ginpili han Chamber hira human rights lawyers Joel Butuyan ngan Gilbert Andres kumo common legal counsels nga magrerepresenta ha ngatanan han ginkilala nga biktima nga otorisado nga umatender ha pagdungog.
Gin aprubahan gihapon han ICC an partisipasyon han dire maubos ha 29 nga indibidwal, samtang waray karawta an 10 nga iba pa nga aplikasyon mahitungod nga gawas na ine ha sakop han panahon han kaso nga iginsalawad kontra ha anay Presidente.
Aatubangon ni Duterte an tulo nga kaso han crimes against humanity kasumpay han pagpatay ha mga suspected drug users, peddlers, ngan mga bystanders dida han iya panahon kumo alkalde han Davao City, bise alkalde, ngan kumo Presidente han Pilipinas.
Nakatalaan naman an confirmation of charges hearing ha Pebrero 23, 2026.
