Gin sigurado ni House Justice Committee chairperson ngan Batangas Rep. Gerville Luistro nga pwede pa makagsalawad hin kadugangan nga impeachment complaint kontra kan VP Sara Duterte.
Ine in samtang dire pa naisusumite han House plenary han duha nga impeachment complaint ha iya komite.
Ha usa nga pahayag, napakianhan hi Luistro kasumpay ha usa pa nga panibag-o nga reklamo kontra kan VP Sara nga posible igsalawad ha adlaw han Lunes (Pebrero 9), pira kaadlaw mahuman igpasa han House Secretary General an duha nga reklamo ha Office of the Speaker of the House.
Pag-eskplikar han magbabalaod, samtang dire pa naipapasa an reklamo ha iya komite in pwede pa karawton han Kamara an mga reklamo, mahitungod nga dire pa nagtitikang an one-year prohibition period.
Dugang pa hine, makokompleto an initiation process kun nai-refer na han plenaryo an impeachment complaint ha Justice Committee ngan ha nasabi nga adlaw gihapon in magtitikang na an pagtikang ha ban.
Ha ilarom han House Rules, mayda napulo nga session days an Office of the Speaker agud ig lakip an complaint ha Order of Business.
Kun mahitabo ine, kinahanglan gihapon mai-refer an reklamo ha Justice panel ha sulod han tulo ka-session days.
Samtang, dire naman ginwawara han magbabalaod an posibilidad nga susuportahan han sobra 1/3 han mga membro han Kamara an usa nga reklamo, dalan agud mas mapadagmit an pag-abante hine, sugad han nahitabo ha 2025 complaint kontra kan VP Sara.
Sugadman, kinahanglan daw nga mahitabo ine ugsa pa man mai-refer ha iya komite an duha nga nauna nga reklamo nga presente ada ha opisina ni Speaker Faustino Dy.
