TACLOBAN CITY – Ginpakilala ha mga istudyante han Tacloban National Agricultural School (TNAS) an gintatawag nga hydroponics farming, usa ha makabag-o nga pamaagi han pagtanom.
Sumala kan Tacloban City Agriculture Office Head, Romelo Anade, an Tacloban National Agricultural School an nag-uusaan nga agricultural ha syudad hiton Tacloban kun diin gin pailarom ha mahugot nga paghag-id an mga istudyante han nasabi nga iskuylahan agud mas maipakita pa an ira dako nga potensyal ha pag-produce hin mga pagkaon.
Pinaagi han solar-powered greenhouse hydroponics nga gin pondohan han Department of Agriculture, in mas nakikit-an han mga istudyante nga dire la makapoy nga trabaho an pag-uma kundi usa nga makabag-o ngan may dignidad nga propesyon.
Sumala pa kan Anade, mismo an mga istudyante an nagpapadalagan ha nasabi nga greenhouse kun diin padayon an pag-research han mga ine kun anu pa nga klase hin pananom an ira pwede maitanom ha nasabi nga greenhouse.
Pinaagi han nasabi nga proyekto in nakaka-income gihapon an mga istudyante tikang mismo ha ira mga tanom nga ira ginbabaligya ha mga hotels, regular nga costumers, ngan publiko.
An eksperyensya han mga istudyante han TNAS in ginlalauman naman nga makakagpahitaas han ira abilidad ngan mga hingyap, nga makaghatag hin dalan para ha kabubwason han moderno ngan sustinable ngan agrikultura
Samtang, nadukdok gihapon han TNAS an ikaduha nga pwesto han 2024 Regional Outstanding Urban Agriculture Awards ha ilarom han Macro Category ha Eastern Visayas.
