TACLOBAN CITY – Dire na nakakasapar an kita han mga tradisyunal ngan modernized jeepney units ha binulan nga ira ginbabayaran ha bangko mahitungod han Libreng Sakay nga gin hahatag han Office of the Vice President.
Ine an sumala kan Northern Barangay Transport Cooperative (NORBATCO) General Manager, Florante Otida.
Naka-dugang pa daw ha paghinay han ira kita in mahitungod nga nadungan gihapon an Libreng Sakay ha ira pagbiyahe kada rush hour, kun diin ada la unta hira nakakabawi-bawi, pero mahitungod han Libreng Sakay in mas ginpipili nala han mga manarakay nga humulat ha pag-agi hine kontra mamasahe ha mga pampasaheros nga sarakyan.
Dugang pa hine, mahitungod nga Tagpuro an katapusan nga ruta han Libreng Sakay in nakukuha gihapon hine an haros ngatanan han mga pasaheros nga naagian hine tikadto ha downtown area han syudad ngan tibalik.
Nabiyahe daw manggud an Libreng Sakay kada alas-5 hiton aga kutob alas-10 hiton aga ngan nagpapadayon naman pag-aabot hiton alas-5 hiton kulop kutob alas-10 hiton gab-i kun diin amu ine an rush hours.
Dugang pa ni Otida, urhi na han igpahibaro ha ira nga mayda tigawas nga programa han Office of the Vice President, kun diin nahikalasan nala hira nga pagka-sunod nga adlaw in mabiyahe na ine sanglit waray na hira nahimo.
May-ada naman daw nahitabo nga konsultasyon ha Land Transportation Franchising and Regulatory Board kun diin ginpahibaro haira nga mayda tiarabot nga Libreng Sakay han OVP, sanglit an ginbuhat han mga Board Members han ira kooperatiba in dumirekta pag-kadto ha opisina han OVP, pero an baton la daw han OVP in aprubado na an programa, sanglit waray na hira mahihimo.
Ha pagkayana naaraba an ira kooperatiba kun hain makuha hin sobra P41,000 nga igbabayad ha bangko kada bulan para han mga modernized jeepneys.
Panawagan pa ni Otida, tanggalon nala an Libreng Sakay ngan igkadto nala ha iba nga probinsya nga mas nanginginahanglan.
