TACLOBAN CITY — Nagpadangat hin letter of refusal an grupo han homeowners association han San Jose, Tacloban City ha buhatan han National Housing Authority tungod ha diri nira pagkarawat han pabalay han gobyerno ha mga relocation sites ha Norte nga parte han siyudad.
Sumala kan Edwin Torres, President han MABATAP Homeowners Association, nga nakikita nira nga damo an mga problema ha mga pabalay han NHA sugad nala han mga substandard nga materyales nga ginpangamit ha paghingayad han mga housing unit ngan kawaray hin kuryente ngan tubig nga nagpapakita gud la nga diri pa talwas nga ukyan an mao nga mga pabalay.
Dugang pa niya nga ginkakabaraka gihap nira nga bangin masapawan ngan diri na maipadayon an rehabilitasyon ha mga nagkabibiktima han bagyo Yolanda tungod ha bago nga ginpropose nga “Bangon Marawi”.
Sugad man may ginduduso naman nira yana an ira gintatawag nga people’s plan nga amu an magiging kabatonan han ira ungara nga mahingadto ha relocation site nga 7 kilometers la an kaharayo tikang ha sentro han siyudad han Tacloban agud nga makatipid an mga residente han purupasahe ngan mas mapahuruharani ha ira mga pakabuhi agud nga makab-ot an gintatawag nga may kalidad nga klase hin pag-ukoy.
