TACLOBAN CITY – Nagin matunog ha social media an usa nga membro han Limasawa Municipal Police Station nga hi PCpl. Ruel Arot, residente han Brgy. Hanginan Maasin City, Southern Leyte, mahuman nga daw plantahan hine hin usa ka-kaha nga sigarilyo an tindahan nga ginpapanag-iyahan hin usa nga residente han Brgy. Magallanes, Limasawa, Southern Leyte.
Makikit-an ha nasabi nga video an pagbutang han pulis hin usa ka-kaha nga sigarilyo ha lamesa hiton tindahan, kun diin kuha gihapon ha nasabi nga video an pagkuha han pulis han sigarilyo tikang ha iya dara nga bag ngan pagbutang hine ha lamesa; gintagan gihapon han pulis hin citation ticket an nasabi nga tag-iya han tindahan nga ginpapagbayad ine han multa.
May-ada manggud ordinansa nga ginpapatuman an munisipyo han Limasawa nga nagdidire han paggamit ngan pagbaligya hin sigarilyo, an hin-o man nga madadakop in pagmumultahon hin maabot hin P300 ngada ha P500.
Sumala kan PLtCol. Mark Nalda, Information Officer hiton Southern Leyte Police Provincial Office, dayun nga nakaabot an nasabi nga video haira buhatan sanglit dayun gihapon nga igin mando han Provincial Director han Southern Leyte Police Provincial Office nga hi PCol. Hector Enage nga ig-relieve an dabi nga pulis agud matagan hin dalan an imbestigasyon.
Basar naman ha ira daw nagin pag-istorya han Chief of Police han nasabi nga istasyon, damo na iton reklamo kasumpay han pamaligya hin sigarilyo ha Brgy. Magallanes pero kun pulis daw iton napalit in dire ine ginbabaligyaan mahitungod nga igindidire an pagbaligya hine ngan may posibilidad nga papagmultahon ine sanglit nagsugo daw iton nasabi nga pulis hin usa nga batos hine para pumalit ha nasabi nga tindahan kun diin ginbaligyaan naman ine; an gin planta nga sigarilyo in daw amu adton napalit han batos hiton pulis ha nasabi nga tindahan.
Waray la daw ka-eksplikar hin tuhay han nasabi nga pulis kun tikang diin o anu an karuyag sidngon han ginbutang hine nga sigarilyo ha lamesa mahitungod nga dayun ine naggawas hin citation ticket.
Dugang pa ni PLt.Col. Nalda, dire daw hine karuyag nga amu gud an nahitabo sanglit padayun pa daw iton ira gindudumara nga imbestigasyon kasumpay han nasabi nga panhitabo.
Ha pagkayana in temporaryo naman nga naka-relieve an nasabi nga pulis agud malikayan nga maimpluwensyahan hine an padayun pa nga imbestigasyon.
Posible naman nga mapasakahan hin kaso an nasabi nga pulis in kaso nga mapamatud-an nga mayda ine sayop bisan paman kun dire magpasaka hin reklamo an tag-iya han nasabi nga tindahan.
