NATIONAL – Umapela hi Senador Ronald “Bato” Dela Rosa ha Senado nga igbalik an P10 bilyon nga pondo nga gin iban para ha Revised Armed Forces of the Philippines (AFP) Modernization Program para ha masunod nga tuig.
Ginbuhat ni dela Rosa an nasabi nga apela ha deliberasyon han plenaryo han Senado ha panukala nga P6.352-trillion national budget bill.
Kun igkukumpara an National Expenditure Program (NEP) ngan an General Appropriations Bill (GAB) nga gin aprubahan han Kamara, in ginkakasubo ni dela Rosa an pag-iiban han House of Representatives ha panukala nga P50 bilyon han Executive Department para ha Revised AFP Modernization Program ha P40 bilyon.
An mga pagbabag-o nga ginbuhat han Kamara in gin padig-on han Senate Finance Committee ha Committee Report han budget bill.
Gintagan-duon gihapon han anay PNP Chief nga an first line of defense han aton nasud in dire dapat pag-likay o pag-iskapo kun mayda mga pag-atake.
Sanglit nag-apela ine nga igbalik an gin iban nga pondo han House of Representatives agud mapakusog an moral han tropa han nasud.
Nagpatapod naman hi Senate Finance Committee Chairperson Grace Poe nga papanginanuon an apela ni dela Rosa ngan ginmalatumat nga andan hiya nga igkonsidera an nasabi nga panukala.
