TACLOBAN CITY — Tungod ha karuyagon nga magkamay-ada hin anak, usa nga pades hin “gay” penguins ha usa nga zoo ha Germany an umampon ha usa nga bonay nga gin-abandona han igkasi nira penguin.
Naobserbahan han mga nagmamangulo ha zoo nga ha sobra nga determinado han “same-sex couple” nga hira Skipper ngan Ping nga magkamay-ada hin kalugaringon nga sisiw o piso nga aalagaan, ginprobaran daw han mga ini nga pisaon an usa nga bato ha paghuna huna nga bonay ini.
Nagkahigayon naman nga gin-abandona han nag uusahan nga babaye nga penguin ha zoo an iya bonay ngan ini yana an gin aalagaan han duwa.
Sumala pa ha mga nagmamangulo ha zoo, “model parents” daw an duwa nga penguins, nga nagbabalyu-ay ha paglumlom ha bonay pinaagi hin pagbutang hini ha ilarom han ira mga tiil.
Yana daw in mahugot nga ginbabantayan han duwa an ampon nga bonay kontra ha mga igkasi nira penguin tungod nga pupuydi ini nga agawon ha ira.
