TACLOBAN CITY – Nakatalaan nga umulpot yana nga Marso 16 ha Guiuan, Eastern Samar an Juan Sebastian Elcano training ship han Spanish Navy, an ikatulo nga pinakadako nga tall ship ha bug-os nga kalibutan, para han reenactment hini ha pagtigaman han ika-500 katuig nga anibersaryo han first circumnavigation ha kalibutan nga ginpangunahan ni Ferdinand Magellan sugadman an selebrasyon ng 500 years Christianity ha Pilipinas.
Sumala kan Guiuan Mayor Analiz Gonzales-Kwan, an mao nga 93 year old training ship in maulpot ha ira bungto ngan magpapabilin ha kadagatan han Suluan ngan Homonhon Island tubtob hiton Marso 18 san-o ini nga kumadto ha Cebu.
Dugang pa han alkalde, ginbabaybay han mao nga barko an tanan han mga gin-agian ngan ginkadtuan ni Magellan ha naging ekspedisyon hini 500 katuig na an nakakalabay.
Ha pagkayana in padayon naman an pangandaman han Guiuan ha pagdumara han mga nakalatag nga mga aktibidad kasumpay han selebrasyon kalakip na an pagdumara hin trade fare, pag-unveil han historic markers ha Suluan ngan Calicoan Island ngan sugadman an misa ha Homonhon Island.
Labot pa hini in usa ha magiging highlight han selebrasyon an pagbisita ni Presidente Rodrigo Duterte ha Guiuan ha maabot nga Marso 18.
Samtang, mahitungod ha nagpapadayon nga pandemya, limitado la an ihap han mga tutugutan nga makatambong ha mao nga mga aktibidad ha masunod nga semana.
