TACLOBAN CITY – Nahipatik nga an Eastern Samar an may pinaka-hitaas nga Inflation Rate ha Sinirangan Bisayas basar han datos dida han naglabay nga Enero 2025.
Sumala kan Philippine Statistics Authority Regional Director Wilma A. Perante, aada ha 3.0 an inflation rate ha Eastern Samar, aada naman ha 2.2% an ha Southern Leyte, 1.1% naman ha Biliran ngan Leyte, ngan 0.8% ha Northern Samar ngan 0.5% naman ha Samar.
Eksplikar hini nga an tulo nga may pinakadako nga nakakontribwer ha pagsaka han inflation han rehiyon in an pagkaon ngan dire makahurobog nga irimnon kun diin, aada ini ha 37.3%, balay, tubig, kuryente, gas, ngan produkto hiton petrolyo nga may ada 24.5%, ngan serbisyo nga aada ha 7.7%.
Dugang pa ni Perante nga an mga presyo dida han nakalabay nga Enero 2024 in nag-umento hin 1.3 yana nga Enero 2025.
Sumala pa han opisyal nga an nagtitikaluya nga Purchasing Power of Peso o kun PPP an rason han paghitaas han inflation kun diin, an piso dida han 2018 in nagin 79 centavos nala pagtamak han Enero 2025.
Samtang, an Biliran naman an nahipatik nga may pinakahitaas nga PPP nga aada ha P0.82 samtang an Samar naman in may pinakamaluya kun diin, aada ini ha P0.76.
Nagpapabilin naman nga 1.3% an inflation rate ha bug-os nga Sinirangan Bisayas tikang han Disyembre 2024 kutob yana nga Enero 2025.
