ORMOC CITY – Samaran an duha nga lalaki mahuman an insidente han pamumusil ha Barangay Gaas, Ormoc City, han nakalabay nga adlaw.
Ginkilala an mga ine kan alyas “Junjun”, 51 anyos, may asawa, usa nga parag-uma, ngan hi alyas “Odik”, 43 anyos, waray asawa, parag-uma, ngan pareho mga residente han Brgy. Gaas.
Subay kan PLTCOL. REY CABELIN, Information Office, Ormoc City Police Office, dayon rumespondi an Police Station 5, mahuman makakarawat hin tawag tikang ha Brgy. Secretary.
Ha pagdatong han lugar, natad-an an siyahan nga biktima nga may igo hin pusil ha nawong.
Samtang, gini-imbestigahan an insidente, utro nga nakabati hin buto hin pusil an kapulisan, diin nakit-an an an ikaduha nga biktima nga may-ada igo hin pusil ha luyo nga bahin han iya liog.
Dayon naman nga nagbuhat hin hot pursuit operation an kapulisan, nga nagresulta han pagkaaresto han suspek nga hi alyas “Serge”, 51 anyos, ngan residente han Barangay Gaas.
Narekober gihapon ha iya an usa nga air rifle o eskopita.
Ginsugod naman ha ospital an duha nga biktima, ngan ha pagkayana in presente nga nagpapaupay.
Basar ha inisyal nga imbestigasyon, nagkamay-ada hin personal nga away an suspek ngan mga biktima.
Naka-detine na an suspek ha Police Station 5, Ormoc City, ngan maatubang naman ha kaso nga frustrated murder, samtang nagpapadayon an imbestigasyon.
