TACLOBAN CITY – Duha nga mga dati nga mga child warriors han New People’s Army (NPA) an nagpasaka hin child abuse charges ala kontra ha pira nga mga miyembro han walhon nga grupo.
Una na nga nagpasaka hin kaso nga rape an former child warrior nga hini Shane, dire hini tinuod nga ngaran, ala kontra kan Paterno Opo alias Dodong, commander han NPA sub-regional committee nga nagkukuta ha probinsya han Leyte ngan Biliran.
Sumala kan Brig. Gen. Zosimo Oliveros, commander han 802nd Infantry Brigade, kakulop nga adlaw nagpasaka liwat an duha pa nga mga dati nga child warriors hin kaso nga pagtalapas han RA 9851 o an “Philipine Act on Crime Against International Humanitarian Law, Genocide, and Other Crimes Against Humanity,” ngan RA 11188 o an “Special Protection of Children in Situations of Armed Conflict Act,” ala kontra ha pira nga mga CPP-NPA terrorists.
Kalakip han pormal nga mga napasakahan han mao nga kaso hira Rosemarie Añora alias Nana, alias Jill/Lon, Jimmy Soledad alias Fred, Nestor Lebico, Sr., Paterno Opo alias Yoyo/Dodong/Taki, alias Yenyen, alias Nana, alias Jill, alias Mira ngan iba pa nga mga miyembro han Squad Abe, Platoon 1, Sub-Regional Committee (SRC) Levox, Eastern Visayas Regional Party Committee han CPP-NPA.
Ginsiguro naman han Regional State Prosecutor’s Office an dagmit nga preliminary investigation bahin han mao nga mga kaso.
